«Болашақ» мектеп жанындағы жазғы лагердің салтанатты ашылуы
Бүгін Р. Асубаев атындағы ЖББ мектебінде «Болашақ» мектеп жанындағы жазғы лагердің салтанатты ашылуы өтті. Ашылу шарасы көтеріңкі көңіл күйде ұйымдастырылып, балалар үшін ерекше әрі қызықты күн болды.
Алдымен лагерь жетекшілері балалармен танысу тренингін өткізді. Бұл тренинг барысында оқушылар бір-бірімен жақынырақ танысып, өзара достық қарым-қатынас орнатуға мүмкіндік алды. Түрлі ойын элементтері арқылы балалар өздерін еркін сезініп, ортаға тез бейімделді.
Келесі кезеңде балаларға қауіпсіздік ережелері түсіндірілді. Демалыс барысында өздерін қалай ұстау керектігі, қауіпсіздік талаптарын сақтау жолдары жан-жақты айтылып, мысалдар арқылы бекітілді.
Одан кейін балалар жұмбақтар шешіп, өздерінің ойлау қабілеттерін шыңдады. Бұл бөлім ерекше қызығушылық тудырып, балалар белсенділік танытты.
Сондай-ақ қозғалыс ойындары мен сергіту сәттері ұйымдастырылды. Балалар түрлі қимылды ойындарға қатысып, көңілдерін көтеріп, сергіп қалды.
Күн соңында балалар жақсы әсер алып, шат-шадыман күйде үйлеріне қайтты. Лагерьдің алғашқы күні барша қатысушылар үшін ұмытылмас, қызықты әрі пайдалы өтті.
